Eustatek 2004. urterako EAEko industria eskualdeen arabera aztertu du eta lan horretatik lortutako datuak kontuan hartuta, Gipuzkoa da eskualde mailan oreka handiena duen lurraldea. Gipuzkoan, eskualdeetako industria kopurua beste bi lurraldeetakoa baino askoz txikiagoa da. Bere zazpi eskualdeetatik bostek Gipuzkoako industri kopuru osoaren %10 baino gehiago dute, bai pertsonal okupatuei bai balio erantsiari dagokionez. Eskualdeak, industri kopuru handiena dutenetatik txikienera sailkatuta, hauexek dira: Donostia-San Sebastián, Debagoiena, Goierri, Urola Kosta eta Debabarrena.

Beste aldean Arabako lurralde historikoa dago. Lurralde honetan, industriako balio erantsiaren ia bi herena (zehazki %63,5) Arabako Lautadan dago; Arabako Mendialdean edo Arabako Ibarrean, aldiz, %0,5 eta %3,9 daude hurrenez hurren. Beste hiru eskualdeetan –Kantauri Arabarra, Arabako Errioxa eta Gorbeialdea- %12,9, %11,0 eta %8,1 daude hurrenez hurren.

Bizkaian, industriak agerpen handia du eskualdeetan. Industriaren %82,0 eskualde bitan pilatzen da: Bilbo Handian (%61,9) eta Durangaldean (%20,1). Bestalde, gainerako eskualdeetako batek ere ez du lurraldeko industri jardueraren %5,0 hartzen. Industria aldetik garrantzia duen hirugarren eskualdea Plentzia-Mungia da, lurraldeko industriaren balio erantsiaren %4,8arekin.

Bilbo Handia, Arabako Lautada eta Donostia-San Sebastián eskualdeek Euskal Autonomia Erkidegoko industriaren balio erantsiaren erdia baino gehiago dute (%50,7) eta, horrez gain, EAEko industrian lan egiten duten pertsonen %47,3 ere badute. Industria duten eskualdeen artean horien atzetik dauden Durangaldea eta Debagoiena kontuan hartuz gero, balio erantsia %66,6 da eta pertsonal okupatuak %64,3 dira, hau da, bi magnitudeetan industria osoaren ia bi herena bi eskualde horietan dago.

Euskal Autonomia Erkidegoko industriak %9,1eko hazkunde nominala izan du 2004. urtean eta batez besteko hazkunde-tasa hori Arabako sei eskualdeetako lauk gainditu dute: Arabako Errioxa (%29,1), Gorbeialdea (%21,8), Arabako Ibarra (%16,2) eta Arabako Lautada (%14,0); gainerako eskualdeek, hala ere, balio positiboak izan dituzte. Bizkaian, soilik bi eskualdek gainditu dute batez bestekoa: Bilbo Handiak (%9,8) eta Enkarterriek (%9,3); Gernika-Bermeo eskualdeak %1,3ko murrizpena izan du. Azkenik, Gipuzkoan bi eskualdek gainditu dute batez bestekoa: Goierriko balio erantsiak %21,4ko hazkundea izan du eta Deba Garaikoak %9,4koa. Lurralde honetan, gainera, Debabarrenak %-0,8ko murrizpena izan du.

Pertsonal okupatuak 2004. urtean izan duen bilakaera neurrizkoa izan da, %0,9ko hazkundearekin. Arabako Lautadak izan ezik, Arabako eskualde guztiek izan dute bilakaera positiboa. Gipuzkoan, soilik Tolosak izan du 2003. urtean baino industria gutxiago. Bizkaian, lau eskualdetan murriztu da industriako enplegu kopurua: Arratia-Nerbioi, Bilbo Handia, Markina-Ondarroa eta Plentzia-Mungia.

Pertsonal okupatua eta balio erantsia industriako faktore-kostuaren eta eskualdearen arabera. 2003-2004. Mila eurotan.

Iturria: Eustat