Eustaten datuen arabera, 2005. urtean 319.788 pertsonak kontratatu zuten osasun-laguntzarako aseguru pribatua Euskal Autonomia Erkidegoan diharduten aseguru-konpainiekin, hau da, aurreko urtean baino %2,8 gehiagok. Kopuru hori azken zazpi urteetako (1999-2005) handiena da. Osasuneko aseguru kolektiboak dira gehikuntza hau gehien eragin dutenak, denboraldi horretan asegurudunen %54,6ko gehikuntza jazo baita.

EAEn diharduten konpainiekin aseguru medikua duten pertsonak EAEko biztanleriaren %15,1 dira. Lurralde historikoen arabera, proportzio hori %20,2koa da Bizkaian, hori baita osasun-asistentzia arloan aseguratzeko joera handiena duen lurraldea; Araban %12,3koa da proportzioa eta Gipuzkoak du kopururik txikiena, %8.

Aseguratuen kopurua poliza motaren arabera, 1999-2005

Iturria: Eustat

Banakako edo familiako modalitateak izan zuen aseguratu gehien (%48,2), gero aseguru kolektiboek (enpresak edo beste talde zehatz batzuk) %34,6arekin eta azkenik mutualitate publikoak (%17,2). 2004. urtearen aldean, aseguru kolektiboetan hazi da gehien asegurudun kopurua, %9,4ko gehikuntzarekin, estatuan gertatu den hazkundearen antzekoa (%9,9). Bestalde, mutualitate publikoek aseguratutako kolektiboak ere gora egin du zertxobait (%0,3). Norbanako edo familiako asegurua duten pertsona kopuruak behera egin du (-%0,7).

Aseguratu gehienek, %98ak, oraindik nahiago dituzte oraindik asistentzia mediku-kirurgikoan estaldura ematen duten mediku-aseguru pribatuak arreta zehatzeko beste aseguruak baino (esaterako, hortz-asegurua).

Osasun-laguntzako aseguruen sektorean, 2005. urtean, guztira 169,7 milioi euroko primak bildu ziren, hau da, Estatuko guztirakoaren %4,4 inguru eta Euskal Autonomia Erkidegoko BPGaren %0,3. 2004. urtearen aldean prima kopurua %7,1 gehitu zen; hala ere, hazkunde hori Estatukoa (%9,5) baino txikiagoa izan zen.

Euskal Autonomia Erkidegoan, asegurudun bakoitzaren urteko prima, batez beste, 531 euro izan zen, estatukoaren azpitik (540 euro). Batez besteko prima hori %4,1 gehitu zen 2004. urtekoaren aldean. Estatukoa %6,1 hazi zen. Batezbesteko primarik txikiena aseguru kolektiboena izan zen (509 euro), eta handiena, norbanakoarena edo familiarena (544 euro).

Osasuneko aseguru medikua duten pertsonek aseguru-entitatearen kontura 1.220.522 kontsulta mediku egin zituzten guztira (2004. urtean baino %3,3 gehiago), hau da, asegurudun bakoitza 3,8 aldiz joan zen medikuarengana, sektore publikoan (ospitaleetan eta ospitalez kanpoko zentroetan) batez bestez egiten diren 7,2 bisitaldien erdia baino ez. Gehien eskatu ziren espezialitateak traumatologia, tokoginekologia, pediatria eta oftalmologia izan ziren.

Ospitaleetan emandako arretari dagokionez, mediku-aseguratzaileetatik etorritako gaixoen artean 49.236 ospitaleratu egin ziren, aurreko urtean baino %4,9 gehiago. Batez besteko egonaldia 3,1 egunekoa izan zen. Guztira 33.117 ebakuntza egin ziren, aurreko urtean baino %2,9 gehiago. Horietatik ohikoenak kirurgia orokorrekoak, traumatologiakoak, oftalmologiakoak eta ginekologiakoak izan ziren.

Asistentzia mediko-farmazeutikoko aseguru libreko entitateen bilakaera

(*) ICEA (Aseguru-entitateen eta pentsio-fondoen arteko ikerketa kooperatiboa)

Iturria: Eustat