2005eko ekitaldian, Euskal Administrazioen (Eusko Jaurlaritza, foru aldundiak eta udal Administrazioak, euren erakunde autonomoekin eta udalez gaindiko erakundeekin batera) gastu arruntak %6,6 hazi ziren, Eustatek emandako datuen arabera. Gastu arrunta 10.186,3 milioi euro izan zen; sarrera arruntak 12.726 milioi izan ziren, urteko hazkunde tasa, 2004aren aldean, %9,9 izan zelarik.

Aurreko elementuen bilakaeratik ondorioztatzen da eragiketa arrunten saldoa (sarrera arruntak ken gastu arruntak) 2.539,8 milioi izan zela, aurreko urtean baino %25,0 gehiago, 2.032,2 izan baitzen.

Zerga sarrerek –sarrera arrunt guztien %90 baino gehiago- %13ko aldakuntza positiboa izan zuten. Haien artean Sozietateen Zergatik eratorritakoek izan zuten urte arteko hazkunderik handiena, %26,2.

Euskal administrazioen zerga sarreren banaketa. 2005 urtea.

Iturria: EUSTAT

BEZak %14,2ko hazkundea izan zuen eta PFEZak %11,4koa. Udal zergen hazkundea txikiagoa izan zen, %6,7, eta baita Zerga bereziena ere, %4,3.

Gastu arruntaren atalen artean hazkunderik handiena Transferentzia Arruntena (itzuli beharrik gabeko diru-laguntzak) izan zen, %7,2; eta hazkunderik txikiena Pertsonal gastuetan, %5,8. Beste gastu arruntek (funtzionamendu gastuak) erdi mailako bilakaera izan zuten, %6,6. Oro har, gastu arruntaren hazkundea %6,6koa izan zen; kontuan hartuz sarrera arrunten hazkundea handiagoa izan zela (%9,9), azkenean 2005ean eragiketa arrunten saldoan %25eko hazkundea dugu.

Eragiketa arrunten saldotik aurrekontu saldo ez finantzariora pasatzeko, kapital eragiketen sarrera eta gastuak kontabilizatu behar dira. 2005ean kapitalaren sarrerek %48,3ko hazkundea izan zuten, eta kapital gastuek (inbertsio errealak gehi kapital transferentziak) hazkunde txikiagoa izan zuten , %3,1, baina positiboa; izan ere, aurreko urtean jaitsi egin ziren (%-1,8). Ondorioz, aurrekontu saldo ez finantzarioa 937,1 milioikoa izan zen, 2004an baino 571,4 milioi gehiago.

Euskal Administrazioen likidazio finkatua. 2005-2004

Iturria: EUSTAT

2005ean Euskal Administrazioen zor bizia 3.596,5 milioi euro izan zen, 2004an baino %3,3 gehiago. Azken urtean amortizatu beharreko zorretik 371,6 amortizatu ziren, baina 487,6ko zor berriak egin ziren eta azkenean amortizatu beharreko zorra handitu egin zen; handitze hau, halere, aurreko urtekoa -%4,4- baino txikiagoa izan zen.

Halaber, Euskal Administrazioen BPGarekiko finantza zorra jaitsi egin zen: %6,56 2004an eta %6,25 2005ean.

Euskal Administrazioen datu finkatuak. 2005. urtea

Iturria: EUSTAT

Euskal Administrazioen zerbitzuko pertsonak 95.388 ziren 2005ean; haien artean, %67,03 erkidegoko administrazio orokorrekoak ziren; %9,95 foru administrazioetan ari ziren eta gainerako %23,02 administrazio lokaletan. %81,3k lan harreman finkoa zuen.