2007ko bigarren hiruhilekoan, ezkontza zibilak gehitu egin ziren aurreko urteko aldi beraren aldean , ia %2 gehiago; guztien %49,7 izan ziren, Eustaten datuen arabera. Portzentaje hori 2007ko lehen hiruhilekokoa (%74,7) baino txikiagoa da. Maiatz eta ekainean dezente hazi zen ezkontzen kopurua, aurreko hiruhilekoan ez bezala, orduan ezkontzak urriak izan baitziren.

2007ko apiril, maiatz eta ekainean 2.747 ezkontza egin ziren Euskal AEn, aurreko urteko hiruhileko berean baino %5 gutxiago. Lurralde historikoka, bizkaitarrek 1.423 ezkontza ospatu zituzten, gipuzkoarrek 895 eta arabarrek 342. Euskal AEtik kanpo bizi direnen kasuan, ezkontzak 87 izan ziren.

2007ko bigarren hiruhileko horretako 2.747 ezkontzetan, bizilekua Euskal Autonomia Erkidegoan duten 2.670 gizonezko eta 2.706 emakumezko ezkondu ziren. Horietatik 2.465 senarrentzat (%92,3), lehen ezkontza izan zen; 18 alargun eta 187 dibortziatu, aldiz, berriro ezkondu ziren. Emakumeen lehenengo ezkontzen ehunekoa gizonenaren antzekoa izan zen: aurretik ezkongabeak ziren emakumeak 2.494 (%92,2) izan ziren; alargunak, 8; eta dibortziatuak, 204.

Ezkontideek eztei-egunean zuten adinari erreparatuta, senarren artean, %74,2k 30 urtetik gora zituzten; emazteen artean, berriz, %58,5ek. Proportzio horiek 2006ko hiruhileko berean izandakoak baino handiagoak dira (%73 eta %55,5 hurrenez hurren) eta beraz, hiruhileko horretan ere eutsi egin zaio gero eta nagusiago ezkontzeko joerari.

1. grafikoa: Ezkontzen hilez hileko mugimendua

Oinarria 100 = b.b.

Iturria: EUSTAT