2007ko lehenengo hiruhilekoan, Euskal AEn 5.141 lagun hil ziren, iazko aldi berean baino %4,4 gehiago, EUSTATen datuen arabera. Lurraldez lurralde, Araban 675 lagun hil ziren, %13,6 gehiago; Bizkaian 2.753, (%+0,7); eta Gipuzkoan 1.713, (%+7,3).

Normalean, urteko lehenengo hiruhilekoan izaten da heriotzarik gehien eta arnas aparatuko gaixotasunak izaten dira heriotza-kopuruan gehikuntza handiena izaten dutenak. Aurten, 2006ko hiruhileko beraren aldean %9,7ko hazkundea izan da, eta aurreko hiruhilekoaren aldean %41,5 gehiago.

Zirkulazio sistemaren gaixotasunen eraginez 1.556 lagun hil ziren; heriotza-kausa nagusia izan ziren eta heriotzen ia herena eragin zuten.

Bigarren heriotza-kausa tumoreak izan ziren eta 1.406 heriotza (%27,3) eragin zituzten. Hirugarren, arnas aparatuko gaixotasunak kokatu ziren, neguko hiletan 597 heriotza eragin baitzituzten.

Heriotzen kausak ez ziren berdinak izan sexu batean eta bestean: gizonezkoen artean, tumoreak hilgarriago gertatu ziren zirkulazio-aparatuko gaixotasunak baino; emakumezkoen artean, berriz, heriotza-kausa nagusia gaixotasun kardiobaskularrak izan ziren, eta tumoreak bigarren. Arnas aparatuko gaixotasunak hirugarren heriotza-kausa dira, oraindik ere, sexu bietan.

2007ko lehenengo hiruhilekoan izandako heriotzen artean, 19 heriotza urtebetetik beheragoko haurrei egokitu zitzaien: 8 mutikori eta 11 neskatori.

2007ko lehenengo hiruhilekoko hazkunde begetatiboa negatiboa izan zen eta 283 biztanle galdu ziren. Herrialdeka, saldo negatiboak izan ziren Bizkaian eta Gipuzkoan, 291 eta 24 biztanle galdu baitzituzten, hurrenez hurren. Araban, ostera, heriotzak gehiago izan ziren jaiotzak baino (+32).

1. taula: Euskal AEko heriotzak sexuka, heriotza-kausaren arabera. Hiruhilekoen alderaketa.

Iturria: EUSTAT