Euskal AEn 1.084 ezkontza izan ziren 2007ko lehen hiruhilekoan, hau da, 2006ko laugarren hiruhilekoan izandako 1.714ak baino %37 gutxiago, eta aurreko urteko hiruhileko berean izandako kopuru berbera, gutxi gorabehera, Eustaten datuen arabera. Ohikoa denez, urteko lehen hiruhilekoan ezkontza gutxi egiten da, batez ere urtarrilean eta otsailean.

Aurreko urteetan gertatu den bezala, ezkontza zibilen ehunekorik handiena (%75,1) hiruhileko horretan izan da, erlijiozko ezkontzak baino halako hiru. Halere, aurreko urteko aldi beraren aldian %1,6 jaitsi da ezkontza zibilen portzentajea. Bizkaian eta Gipuzkoan 2006ko lehenengo hiruhilekoaren aldean jaitsi egin ziren eta %79,3ra eta %69,5era iritsi ziren, hurrenez hurren. Araban, berriz, igoera apala gertatu zen eta ezkontza zibilen portzentajerik altuena du (%81,6).

2007ko lehen hiruhileko horretako 1.084 ezkontzetan, bizilekua Euskal Autonomia Erkidegoan duten 1.054 gizonezko eta 1.062 emakumezko ezkondu ziren. Horietatik, 916 senarrentzat (%86,9), lehen ezkontza izan zen; 10 alargun eta 128 dibortziatu berriro ezkondu ziren. Lehenengo aldiz ezkondutako emakumeen portzentajea handiagoa izan zen gizonena baino; 932 izan ziren (%87,8); alargunak 10 eta dibortziatuak 119.

Ezkontzak ezkontideek eztei-egunean zuten adinaren arabera banatuz gero, senarren arteko %79,5ek 30 urtetik gora zituzten ; emazteen artean, berriz, %67,6k. Proportzio horiek 2006ko hiruhileko berean izandakoak baino handiagoak dira (%79 eta %65 hurrenez hurren) eta beraz, hiruhileko horretan ere eutsi egin zaio gero eta nagusiago ezkontzeko joerari.

Bestalde, sexu bereko pertsonen artean 27 ezkontza egin ziren, aurreko urteko hiruhileko berean baino 12 gutxiago; 16 gizonen artekoak eta 11 emakumeen artekoak.

1. grafikoa: Ezkontzen hilez hileko mugimendua