2006an Urola-Kostaldea izan da industri jardueran hazkunderik handiena (%13,9) izan duen eskualdea; ondoren Tolosa (%11,8), Gernika-Bermeo eta Plentzia-Mungia (%11,4 biek), Eustaten datuen arabera. Beste muturrean hazkunde negatiboa izan duen eskualde bakarra dugu, Enkarterriak (%-3,1). Ondoan Arabako Ibarrak (%+0,9) eta Gorbeiako Inguruak (%+1,3). Halere, hiru eskualde hauetan Euskal AEko industri enpleguaren %3 besterik ez dago, 7.952 pertsona inguru.

Hiriburuetan eta beren inguruetan sortu zen Euskal AEko industri aberastasunaren erdia baino pittin bat gehiago %50,8. Industri balio erantsiaren %26,3 Bilbo Handian sortu zen; ondoren Arabako Lautada (Vitoria-Gasteiz) dator, %12,8, eta gero Donostialdea, %11,7. Hiruren artean 118.291 pertsona enplegatzen zituzten industrian; alegia, hiru herrialde historikoetan industriaren sektorean okupatutako pertsonen %47,2.

Herrialdeka, Gipuzkoak du eskualde-orekarik onena; izan ere, haren zazpi eskualdeetako seietan balio erantsiaren hazkundea batez bestekoaren gainetik izan da. Guztira %8,6 hazi zen, eta hazkunderik handiena izandako hiru eskualdeek –Urola Kostaldea (%13,9), Tolosaldea (%11,8) eta Goiherri (%9,6)- herrialdeko balio erantsiaren %36 osatzen dute. Industri pisu handiko beste eskualdeak ere –Deba Goiena (%9,0) eta Donostialdea (%6,3) batez bestekoaren gainetik hazi ziren.

Bizkaia izan da hazten bigarren, %4,6 eta Euskal AEko balio erantsi industrialaren %41,6 sortu zuen; sektore horretan 103.715 pertsona enplegatu zituen (%41,3). Herrialde honetan, Plentzia-Mungiak eta Gernika-Bermeok izan zituzten emaitzarik onenak; bietan %11,4 izan zen balio erantsiaren hazkundea. Herrialdean hazkunderik txikiena izandako eskualdeak, Enkarterriak, izan zuen, baita ere, Erkidegoko txikiena.

Araba %3,8 hazi zen 2005aren aldean eta 2006an Euskal AEk sortutako industri aberastasunaren %20,1 ekarri zuen. Hazkunderik handienak: Mendialdea (%9,1), Kantauri arabarra (%7,5) eta Arabako Errioxa (%5,9). Araban industri pisurik handiena duen eskualdea, Lautada, zeinak baitu balio erantsiaren %62, %3 hazi zen, bai Arabako, bai Euskal AEko batez bestekoaren azpitik.

2006ko langile landunen bilakaera apala izan da, %0,5 hazi delarik. Eskualdeka, hazkunderik handienak hauek izan zituzten: Arratia-Nerbioi (%5,0), Plentzia-Mungia (%4,0) eta Tolosa (%3,4). Beste muturrean zazpi eskualdek hazkunde negatiboak izan zituzten. Nabarmentzekoak dira Gorbeiako Inguruak, non industri enpleguaren galera %-5,1 izan den eta Enkarterriak, %-3,3.

Industriako langile okupatuak eta balio erantsia faktoreen kostuetan, eskualdeka. 2006. Euroak milakotan.

Iturria: Eustat