2007. urtean, Euskal AEn guztira 1.090 milioi euro inbertitu ziren Ikerketa Zientifiko eta Garapen Teknologikoko (I+G) jardueretan, aurreko urtean baino %20 gehiago, EUSTATek landutako datuen arabera. Gastu arruntak %14 hazi ziren, baina, batez ere kapital-gastuak (inbertsioa), aurreko urtearen aldean %57 hazi direnak, izan dira I+Gko hazkunde nabarmenari lagundu diotenak, 135 milioi eurotik 2007ko 212ra pasa direlarik.

Euskal AEko BPGrekiko, 2007an I+Gko gastua %1,65 izan zen, aurreko urtean baino hemezortzi ehunen gehiago, azken urteetan adierazle honek izandako egonkortasuna hautsirik. Horrela, 2006 Europako datu eskuragarriei erreparatuz, txikitu egin da 2007an 27-Europar Batasuneko batez bestekoarekiko (%1,84) tartea; azken hau egonkortu egin da azken urteetan. Euskal AEko gastu hori 2006ko Espainiako batez bestekoaren (%1,20) gainetik dago.

1. grafikoa: I+Gko barne-gastua, BPGrekiko (%).

Iturria: Euskal AE: EUSTAT. Espainia- Europar Batasuna: INE eta EUROSTAT

Egiaztatu egiten da erlazio positiboa dagoela biztanleko BPGren eta I+Gra bideratutako BPGren ehunekoen artean. Herrialde aberatsenek egiten dute I+Gko inbertsiorik handiena, hau da, euren BPGren %2,5 gainditzen dutenak: Suedia, Finlandia, Japonia, Suitza, Islandia, AEB, Alemania eta Austria. Tarteko ahalegina (BPGko %1,5-%2,5) egiten dutenen artean, Euskal AEz gain: Danimarka, Frantzia, Belgika, Erresuma Batua, Herbehereak, Eslovenia, Txekiar Errepublika eta Norvegia. Inbertsiorik baxuenak Luxenburgon (%1,47) Irlandan (%1,35), Espainian (%1,20), Estonian (%1,14), Italian (%1,09), Hungarian (%1,00), Kroazian (%0,87), Portugalen (%0,83), Grezian (%0,57) eta Polonian (%0,56) egiten dira.

Euskal AEn egindako I+Gko gastuaren %81,3 enpresa-sektorean egikaritu zen

Egikaritza-sektoreei dagokienez, enpresek I+Gko gastuaren %81,3 egin zuten; %15,2 unibertsitate-ikerketara bideratu zen, eta gainerako %3,5 Administrazioaren mendeko zenbait organismo publikok egikaritu zuten.

Beraz, enpresen sektoreak egiten du, Euskal AEn, konparatiboki, ikerketa ahaleginik handiena. Alde handia dago estatuko emaitzekiko: enpresek I+Gko gastuaren %55,7 egikaritu zuten, goi-mailako irakaskuntzak %27,7 eta herri-administrazioak gainerako %16,6.

Industri enpresetan zentratuz, nabarmentzekoak dira ondoko jarduera-adarrak: garraio materiala, metalezko artikuluak eta makineria, hiruren artean enpresen sektoreko barne gastuaren %18 egikaritu zutelarik. Zerbitzu-enpresen aldetik, I+Gko zerbitzuetakoak dira baliabiderik gehien bideratzen dituztenak, eta guztien artean enpresen barne gastuaren %41era iritsi ziren.

Finantzaketaren ikuspegitik, finantzaketa pribatuak, enpresen bidez, 643 milioi euro bideratu zituen ikerketara, guztizkoaren %59; finantzaketa pribatua %38ra iritsi zen, eta funtsen %3 atzerrian atzeman ziren. Euskal AE finantzaketa pribatu handieneko herrialdeen artean kokatzen da oraindik ere, Europako batezbestekoaren gainetik.

1. taula: I+Gko adierazleak

(*) DOE: dedikazio osoko baliokidetza

Iturria: Euskal AE: EUSTAT. Espainia: INE- Europar Batasuna: EUROSTAT

Euskal AEn dedikazio osoko baliokidetzan I+Gn lanean aritu ziren langileak 14.435 izan ziren, 2006an baino %10,5 gehiago. Horietatik %64, hau da, 9.220, ikertzaileak dira. Euskal AEko I+Gk biztanleria landunaren milako 14,2 hartu zuen (Estatuan milako 9,3 2006an) eta ikertzaileak aldiz, milako 9,1 izan ziren (Estatuan milako 5,7 2006an).

Emakumeen presentzia hirukoiztu egin da azken hamarkadan

I+Gko jardueretan emakumeek duten parte hartzearen ehunekorik handienak herri-administrazioetan eta goi-mailako irakaskuntzan gertatzen dira, %49 eta %45 baitira, hurrenez hurren. Enpresetan berriz, %29 dira emakumeak.