Eustaten datuen arabera, 2007. urtean Euskal AEn 17.692 gehiago izan ziren etorritakoak joandakoak baino; 2006.aren aldean %22,4ko hazkundea.

Erkidegorako migrazio-saldo positiboa duen ondoz ondoko zortzigarren urtea dugu hau. Lurraldeka, Bizkaiak 9.098 pertsona gehiago izan ditu; kopuru absolutuetan migrazio-saldorik altuena, eta aurreko urtekoaren aldean %16 gehiago. Gipuzkoak 4.198 pertsona irabazi ditu, aurreko urtean baino %26 gehiago. Arabak 4.396, %36 gehiago.

1. grafikoa.- Migrazio-saldoaren bilakaera Lurralde Historikoen arabera

Iturria: EUSTAT

Migrazio saldo positiboa atzerritik etorritakoei esker izan da.

Atzerriko etorkinen migrazio-saldoa positiboa da; 19.884 pertsona, eta horrek, aurreko urtekoaren aldean, %9,6ko gehikuntza ekarri du. Euskal AEren eta gainerako autonomia-erkidegoen arteko mugimenduak bakarrik kontuan hartuz gero, 2007. urtean -2.192 pertsonakoa da galera migrazio-saldoan.

Euskal biztanleriaren %9,4k bizileku aldaketaren bat egin du 2007. urtean zehar. Mugimendu hori %67an Euskal AE barruan izan da, eta gainerako kasuetan erkidegotik kanporakoa.

Euskal AEn, guztira, 199.608 kasutan aldatu dira ohiko bizilekuak:

-Kopuru horretatik, 89.600 kasutan udalerrian bertan aldatu dira bizilekuak.

-Erkidego barruko mugimenduak, hau da, bai jatorria, bai helmuga Euskal AEko udalerrietan dituzten mugimenduak 44.978 izan dira.

-Era berean, kanpoko edo erkidegoz kanpoko 41.361 immigrazio gertatu dira. Jatorria gure erkidegoaz kanpoko udalerri batean eta helmuga Euskal AEn duten mugimenduak dira horiek.

-Azkenik, kanpoko edo erkidegoaz kanpoko 23.669 emigrazio gertatu dira. Jatorria gure autonomiaerkidegoko udalerri batean eta helmuga gure erkidegotik kanpora duten mugimenduak dira horiek.

1. taula. Migrazio-mugimenduen eta saldoen bilakaera. Euskal AE.

Iturria: EUSTAT

Kanpoko edo erkidegoz kanpoko mugikortasunari dagokionez, 2007. urtean AEko mila biztanletik 30,5 mugitu dira (‰37,5 Araban, ‰30,7 Bizkaian eta ‰27,1 Gipuzkoan); alabaina, mugikortasun hori gainerako autonomia-erkidegoetakoarekin erkatuta txikia da, azken hauetan mila biztanletik 51 mugitzen baitira.

AEra bertatik jasotzen dutena baino gehiago ekartzen duten erkidegoak hauek dira: Murtzia, Katalunia, Andaluzia, Gaztela-Mantxa, Valentzia eta Aragoi.

Euskal AEko emigratzaileentzat, honako autonomia-erkidego hauek dira erakargarrienak, hurrenkera honetan: Kantabria, Gaztela eta Leon, Nafarroa, Errioxa, Galizia eta Madril. Seiren artean, gure erkidegotik irtendako bi lagunetik bat hartzen dute.

Atzerriko nazionalitatea duten etorkinak, 2007. urtean, 28.928 pertsona izan ziren; gure erkidegora izandako sarreren %70. 2.000.ean hasi ziren migrazio saldo positiboak; harrezkeroztik Euskal AEn atzerritarren immigrazioen bolumena asko igo dela ikusi dugu. 2007. urtean atzerriko nazionalitatea duten etorkinen kopurua %19 hazi da; horien arteko 7.113 beste erkidegoren batetik etorri ziren.

Titulumailari dagokionez, lehen mailakoa dute immigrazioen %54k eta emigrazioen %52k; goimailako titulua emigrazioen %16k eta immigrazioen %15ek dute.

Emigratzaileen batez besteko adina, 35,1 urte, handiagoa da etorkinena (30,9) baino.