2020/09/11ko prentsa-oharra

ZERBITZUEN KOIUNTURAKO INDIZEA. MERKATUKO BESTE ZERBITZUAK. 2020/II

Merkatuko zerbitzuen salmentak % 29,0 murriztu dira 2020ko bigarren hiruhilekoan Euskal AEn

Atzerakada orokorra izan da adar guztietan: muturretan, Ostalaritzan -% 64,3koa izan da, eta Informazio eta Komunikazioetan -% 4,8koa

Merkatuko beste zerbitzu batzuk (aurrerantzean, Merkatuko zerbitzuak) epigrafean bildutako sektoreek % 29,0ko beherakada izan dute salmentetan, aurreko urteko bigarren hiruhilekoarekin alderatuta, termino errealetan eta egutegiaren ondorioak behin kenduta, Eustaten datuen arabera.

Aurreko hiruhilekoarekin alderatuta, zerbitzu horien salmentak % 24,0 murriztu dira, prezio konstanteetan eta urtaroen ondorioak ezabatu ondoren.

Merkatuko zerbitzuen barruan, salmenta errealen urte arteko atzerakada orokorra da. Nabarmentzekoa da Ostalaritza-sektoreko salmenten beherakada, non % 64,3ko jaitsiera aurreikusten baita. Atzetik datoz Administrazio-jarduera eta zerbitzu osagarrien salmenta-indizea (% 31,7ko jaitsiera), Garraio- eta biltegiratze-indizea (% 25,2ko jaitsiera), Jarduera profesional, zientifiko eta teknikoen indizea (-% 10,9 urte artean) eta, azkenik, Informazio eta komunikazioen sektorearena (% 4,8ko murrizketa). Hori guztia, aurreko urteko bigarren hiruhilekoaren aldean eta behin zuzenduta egutegi-ondorioak.

Lurraldeen arabera, eta prezioen eta egutegiaren eragina kenduta, Araban urte batetik bestera % 32,2 jaitsi da salmenta-indizea, Bizkaian % 26,2 eta Gipuzkoan % 33,2.

Euskal AEko Merkatuko zerbitzuetan dabiltzan langileen indizea % 5,6 jaitsi da urte arteko aldian. Aurreko hiruhilekoaren aldean jaitsiera % 4,9koa da.

INFORMAZIO OHARRA

Ekainaren 21ean amaitu zen martxoaren 14ko 463/2020 Errege Dekretuaren bidez deklaratutako alarma-egoera, COVID-19ak eragindako osasun-krisiaren egoera kudeatzeari buruzkoa. Bertan hartutako aparteko neurriek eragin zuzena izan dute ZKIn parte hartzen duten establezimenduen jardueran.

Indize ekonomiko koiuntural honetan eta beste indize ekonomiko koiuntural batzuetan kontuan hartzen diren langile enplegatuen artean, Enplegua Aldi Baterako Erregulatzeko Espedientea (EABEE) duten pertsonak sartzen dira, Europar Batasuneko Estatistika Bulegoak (Eurostat) Methodology of Short Term Business Statistics eskuliburuan jasotzen duen enplegatuaren definizioari jarraituz.

Egutegiaren ondorioak zuzentzeko eta serieak urtaro-ondoriorik gabe uzteko erabilitako modeloek COVID-19ak aztertutako aldagaietan duen eragina barne hartzen dute, Europar Batasuneko Estatistika Bulegoak (Eurostat) Guidance on Time Series Treatment in the context of the COVID-19 crisis ohar metodologikoan emandako gomendioei jarraituz.

Eustatek eskerrak eman nahi dizkie lagundu duten enpresa guztiei egindako ahaleginagatik aparteko baldintza hauetan. Haiei esker, 2020ko bigarren hiruhilekoko ZKI laginaren % 90,74ko estaldurarekin kalkulatu da (laginaren informazioa gehienbat uztailean eta abuztuan jaso da).

Informazio gehiagorako:

Eustat - Euskal Estatistika Erakundea / Instituto Vasco de Estadística Donostia-San Sebastián, 1 01010 Vitoria-Gasteiz Prentsa-zerbitzua: servicioprensa@eustat.eus Tlf: 945 01 75 62