2022/10/25eko prentsa-oharra

OSASUN ARRETA PRIBATUAREN ESTATISTIKA. 2021

Euskal AEn establezimenduak dauzkaten erakundeetan osasun-aseguru bat duten pertsonen kopuruak % 6,4 egin du gora 2021ean

Emakumeak asegurua duen kolektiboaren % 53 dira

2021ean, Euskal AEn bizi diren 504.762 pertsonak, guztira, Euskal AEn finkatuta dauden erakundeetan osasun-aseguru bat dute; alegia, % 6,4ko igoera egon da, 2019 ekitaldiarekin alderatuta, Eustaten datuen arabera.

Aseguratutako pertsona horiek osasun-sistema publikoaren zerbitzuak osatzea edo espezialitate batzuetan prestazioak areagotzea dute helburu, eta, pertsona kopuru horretan egon den igoeraren ondorioz, aseguru medikoa duten herritarren proportzioa % 23ra iritsi da (2019an % 22). Lurralde historikoen arabera, proportzio hori handiagoa da Bizkaian (% 30,4ra iritsi da), ondoren Araban (% 17,9) eta, azkenik, Gipuzkoan (% 13,6). Osasun-asegurua duten pertsonen kopuruaren igoera, hala ere, handiagoa izan da bai Araban (% 9,0) bai Gipuzkoan (% 9,5). Bizkaian igoera % 5,1ekoa izan da.

Kolektibo horren ezaugarriei dagokienez, % 52,8 emakumeak izan dira eta % 47,2, gizonak. 45-64 eta 25-44 urte bitarteko taldeak aseguratutako biztanleen % 61 izan dira, eta, adin pediatrikoan izan ezik, nagusiak nagusitu dira haietan guztietan, eta, bereziki, amatasun-etaparekin zerikusia duenean.

Kontsulta mediko batera joan diren gehienak espezialista bat bisitatzeko joan dira

Guztira, 1,6 milioi kontsulta izan dira aseguru pribatuko erakundeen kargura; alegia, 3,1 bisita medikuarenera aseguratu bakoitzeko. % 11,3 lehen mailako arretara (familia-medikuntza eta pediatria) eta % 88,7 (1,4 milioi) arreta espezializatura. Honako hauek izan dute eskaririk handiena, hurrenkera honi jarraikiz: traumatologia (215 mila baino pixka bat gehiago), obstetrizia eta ginekologia, oftalmologia eta dermatologia (haietan guztietan, urtean 100 mila bisita baino gehiago).

Aseguru kolektiboak izan dira osasuneko primen bolumena areagotzea ekarri dutenak

Osasun-asistentzia pribatuko zerbitzuak eskaini dituzten konpainiek 366,2 milioi euro bildu dituzte, primen kontzeptuan; alegia, % 6,5 gehiago 2019an baino. Zifra hori BPGd-aren % 0,47 izan da 2021ean. Lurraldeen arabera, prima horren ordainketaren % 71,2 Bizkaian kontzentratu da, % 18,2 Gipuzkoan eta % 10,6 Araban.

Kontratatutako polizen modalitatea kontuan izanda, primen % 52 aseguru kolektiboena izan da, % 40,7 aseguru indibidualena edo familiarrena eta % 7,3 funtzionarioen mutualitate publikoena. 2019. urtearekin alderatuta, aseguru kolektiboak hazi dira gehien (% 10,8), gero indibidualak edo familiarrak (% 2,6), eta funtzionarioen mutualitateetakoek, berriz, % 0,2 egin dute behera.

Ohar metodologikoa:

Estatistika honek Euskal Autonomia Erkidegoan gutxienez establezimendu bat duten aseguru libreko erakundeen informazioa jasotzen du. Ez dira jasotzen borondatezko gizarte-aurreikuspeneko erakundeak; izan ere, ez dute aseguratzaile-izaera.

Argibide gehiagorako:

Eustat - Euskal Estatistika Erakundea / Instituto Vasco de Estadística Donostia-San Sebastian kalea, 1 01010 Vitoria-Gasteiz Prentsa Zerbitzua: servicioprensa@eustat.eus Tel.: 945 01 75 62 Osasun-arreta pribatuaren inguruko Estatistikari buruzko prentsa-ohar gehiago