2023/02/15eko prentsa-oharra

ZERBITZUEN KOIUNTURA INDIZEA. BESTE MERKATU ZERBITZU BATZUK. 2022/IV

Euskal AEko merkatu-zerbitzuen sektorean, salmentek % 11,4ko igoera izan dute 2022. urtean

Igoerarik handiena izan duten sektoreak Ostalaritza (% 23,2) eta Garraioa eta biltegiratzea (% 18,3) izan dira

Eustatek landutako datuen arabera, 2022. urte osoan Beste merkatu-zerbitzu batzuk sektoreko salmentek % 11,4ko igoera izan dute prezio konstanteetan, 2021. urtearekin alderatuta.

Urte osoko bilakaera positiboa izan da sektore guztietan, Jarduera profesionalak, zientifikoak eta teknikoak sektorean izan ezik. Azken kasu horretan, 2022ko salmentak 2021ean erregistratutakoak baino % 1,6 txikiagoak izan dira.

Urtean emaitza positiboak izan dituzten sektoreen artean, Ostalaritza eta Garraioa eta biltegiratzea nabarmendu dira, % 23,2ko eta % 18,3ko igoerekin, hurrenez hurren. 2022an, salmentek gora egin dute, halaber, Administrazio-jarduerak eta zerbitzu osagarriak eta Informazioa eta komunikazioak sektoreetan (% 8,1 eta % 4,6ko igoera, hurrenez hurren).

2022ko laugarren hiruhilekoan, Euskal AEko Beste merkatu-zerbitzu batzuk sektoreko salmentek % 8,2ko igoera izan dute aurreko urteko hiruhileko berarekin alderatuta, prezio konstanteetan eta egutegi-ondorioak kendu ondoren.

Aurreko hiruhilekoarekin alderatuta, berriz, prezio konstanteetan eta bidezko urtaro-ondorioak kendu ondoren, salmenten igoera % 2,3ra iritsi da.

Beste merkatu-zerbitzu batzuk sektorearen barruan, salmenta errealek (prezio konstanteetan) gora egin dute urteko azken hiruhilekoan, aurreko urteko hiruhileko berarekin alderatuta. Igoera hori Garraioa eta biltegiratzea sektoreak eta, neurri txikiagoan, Ostalaritza sektoreak izan duten portaeragatik izan da (izan ere, sektore horietan salmentek % 23,4ko eta % 3,6ko igoera izan dute, hurrenez hurren). Jarduera profesionalak, zientifikoak eta teknikoak sektorean, salmentek % 1,5eko beherakada izan dute urteko laugarren hiruhilekoan, aurreko urteko hiruhileko berarekin alderatuta. Administrazio-jarduerak eta zerbitzu osagarriak sektorean, berriz, % 0,3ko beherakada izan da, eta azkenik, Informazioa eta komunikazioak sektorean % 0,1ekoa.

2022ko hirugarren hiruhilekoarekin alderatuta, salmenten beherakada orokorra izan da, Garraioa eta biltegiratzea sektorearen salbuespenarekin, % 9,3ko igoera izan baitu sektore horrek. Jarduera profesionalak, zientifikoak eta teknikoak sektorean, salmentek % 1,7ko beherakada izan dute hiruhilekotik hiruhilekora, Administrazio-jarduerak eta zerbitzu osagarriak sektoreak % 1,5ekoa, eta Ostalaritza eta Informazioa eta komunikazioak sektoreek, berriz, % 1,4koa bi kasuetan.

Lurralde historikoak kontuan hartuta ikus daitekeenez, urtetik urterako % 13,7ko igoera izan da Gipuzkoan, % 6,4koa Araban eta % 5,9koa Bizkaian.

Aurreko hiruhilekoarekin alderatuta ere, salmenten igoera orokorra izan da. Zehazki, salmentak aurreko hiruhilekokoak baino % 5,0 handiagoak izan dira Gipuzkoan, % 2,1 handiagoak Araban, eta % 0,8 handiagoak Bizkaian.

Euskal AEko zerbitzu horietan diharduten langileen indizeak % 1,1eko beherakada izan du 2022ko laugarren hiruhilekoan, aurreko urteko laugarren hiruhilekoarekin alderatuta. Urteko hirugarren hiruhilekoarekin alderatuta, berriz, % 0,3ko beherakada izan da.

INFORMAZIO OHARRA

Eustatek eskerrak eman nahi dizkie lagundu duten establezimendu guztiei, aparteko zirkunstantzietan egindako ahaleginagatik. Haiei esker, laugarren hiruhilekoko indizea % 92,8ko estaldurarekin kalkulatu da.

Informazio gehiagorako:

Eustat - Euskal Estatistika Erakundea / Instituto Vasco de Estadística Donostia kalea, 1 01010 Vitoria-Gasteiz Prentsa-zerbitzua: servicioprensa@eustat.eus Tel.: 945 01 75 62