2024/10/29ko prentsa-oharra
INFORMAZIOAREN GIZARTEAREN INKESTA. FAMILIAK. 2024
Euskal AEko 15 urte eta gehiagoko biztanleen % 89,9 Internetera konektatu da 2024an, 2023an baino ehuneko 1,6 puntu gehiago
Interneteko erabiltzaileen % 97,7k WhatsApp eta berehalako mezularitzako antzeko aplikazioak erabiltzen ditu
Eustaten datuen arabera, Euskal AEn 1.721.800 izan dira 2024ko bigarren hiruhilekoan Interneta erabili duten 15 urte eta gehiagoko pertsonak; hau da, azken hiru hilabeteetan, etxean, lantokian edo beste nonbait, Internetera konektatu direnak. Kopuru hori adin horretako biztanleen % 89,9 da, eta 2023ko aldi beretik 1,6 puntu igo da.
Aurreko urteetan bezala, 65 urte eta gehiagoko biztanleen artean hazi da gehien Interneteko erabiltzaileen kopurua 2024an: % 65era arte (ehuneko 3,8 puntu gehiago). Hala eta guztiz ere, 55-64 urtekoen taldetik (% 97,9) eta, bereziki, 54 urtetik beherakoen taldetik oso urrun daude zifrak, ia biztanle guztiek erabiltzen baitute Internet.
Gizonen % 91k erabiltzen du Internet, eta emakumeen % 88,8k. Generoen arteko aldea ehuneko 2,2 puntutan dago 2024an, hau da, 2023an baino 0,2 puntu gehiago. Nabarmentzekoa da 11.600 internauta berri daudela 65 urte eta gehiagoko adin-tartean.
Alde horretatik, lurralde historikoetan ez dago alde nabarmenik. Araba da erabiltzaileen ehunekorik handiena duen lurralde historikoa (% 90), eta gehien hazi da 2023. urtearen aldean (ehuneko +2,4 puntu); ondoren, Bizkaia (% 89,9) eta Gipuzkoa (% 89,8) daude.
EAEko hiru hiriburuei dagokienez, egoera aurrekoaren antzekoa da. Gasteiz, gainerakoek baino hazkunde handiagoa izan ondoren (+2,4 ehuneko-puntu), Interneteko erabiltzaileen proportziorik handiena duen hiriburua da (% 90), Bilbo (% 89,7) eta Donostia (% 89,1) baino hamarren batzuk gehiago. Eskualde mailan, ehuneko 3,1 puntuko aldea dago Plentzia-Mungiako balio handienaren (% 91,7) eta Arabako Mendialdeko balio txikienaren (% 88,6) artean.
Interneten erabilera gehiago hazi da pertsona ez-aktiboen eta langabeen artean
Jarduerari dagokionez, ia ikasle guztiek (% 99,9) eta biztanleria okupatuak (% 99,2) erabiltzen dute Internet. Bestalde, biztanleria ez-aktiboa eta langabetua (% 75,3), 2023ren aldean gehien (3,6 puntu) hazi den kolektiboa izan arren, gainerako bietatik oso urrun dago, ehuneko 24 puntu inguruko aldearekin.
Interneten nabigatzeko hizkuntza nagusia gaztelania da (% 97,4), ondoren euskara (% 19,5) eta ingelesa (% 18,5). Interneteko ia erabiltzaile guztiak (% 98,7) etxebizitza partikularretik sartzen dira.
Internet beste pertsona batzuekin komunikatzeko eta informazioa bilatzeko erabiltzen da gehien
Komunikatzeko eta informazioa eskuratzeko zerbitzuak dira Interneteko erabiltzaile gehienek gehien erabiltzen dituztenak (% 99,5). WhatsAppen eta berehalako mezularitzako antzeko beste aplikazio batzuen erabilera da hedatuena, Interneteko erabiltzaileen % 97,7k erabili baitute. Erabiltzaile gehienek (% 95etik gorako ehunekoekin) erabiltzen dute, ezaugarri sozio-demografikoak (adina, sexua, jarduerarekiko erlazioa) alde batera utzita. Adina kontuan hartuta, 65 urte eta gehiagoko pertsonek erabiltzen dituzte gutxien aplikazio horiek, erabiltzaileen % 95,9k, hau da, adin horretako biztanle guztien % 62,3k (aurreko urtean baino ehuneko 4 puntu gehiago).
Komunikazio- eta informazio-zerbitzu horien artean, honako hauek nabarmentzen dira: mezu elektronikoak jasotzea edo bidaltzea (% 85,2), ondasun eta zerbitzuei buruzko informazioa bilatzea (% 81,5) eta albisteak, egunkariak edo gaurkotasuneko aldizkariak irakurtzea (% 79).
Entretenimendurako eta sormenerako zerbitzuak erabiltzaileen % 88,3k erabiltzen ditu, batez ere gazteenek: 15 eta 24 urte bitarteko ia biztanle guztiek erabiltzen dituzte horrelako zerbitzuak, bereziki musika entzutekoak (% 91,4). Hazkunderik handiena eskaripeko filmak edo bideoak ikustean eman da (ehuneko +7,2 puntu) 2024an 2023an baino. Aitzitik, gehien murriztu den zerbitzua Web orri batean eduki propioak jartzea da, partekatua izan dadin; izan ere, Web orri horretan erabiltzaileen % 17,7 dago (-7,8 puntu).
Internet erabiltzen duten biztanleen % 61,9k administrazio elektronikoa erabili du, eta administrazioek emandako zerbitzuen artean, administrazio-izapideak telematikoki egitea da ohikoena (betetako inprimakiak bidalita) (% 58). Kalkuluen arabera, 1.276.400 pertsonak erabili dute banka elektronikoa (erabiltzaileen % 74,1ek, +2,8 puntu), 2023an baino 85.000 pertsona gehiagok.
977.000 pertsonak baino gehiagok erosi dituzte ondasunak eta zerbitzuak Internet bidez azken hiru hilabeteetan, hau da, 15 urte eta gehiagoko euskal biztanleriaren % 51k (ehuneko 2,6 puntu gehiago 2023an baino); zifra hori Internet erabiltzen duen biztanleriaren % 56,8 da. Internet bidez kontsumitzen duten ia pertsona guztiek erosi dute produktu fisikoren bat (% 92), hala nola arropa, oinetakoak edo osagarriak (% 66,2) edo etxerako ondasunak (% 34,2). Erdiek zerbitzuren bat erosi dute (% 49,2), hala nola kultura-ekitaldietarako sarrerak (% 29), ostatuak (% 28,4) edo garraio-zerbitzuak (% 23,4). Formatu fisikoan edo deskargatzeko moduan, Internet bidez kontsumitzen duten biztanleen % 16,5ek liburuak, aldizkariak edo egunkariak erosi ditu.
Aldea dago gizonek eta emakumeek Sarean erabiltzen dituzten zerbitzuetan
Internetek eskaintzen dituen zerbitzuen artean, emakumeen % 60,9k osasunarekin lotutako zerbitzuak erabiltzen ditu, hala nola osasunari buruzko informazioa bilatzea (Internet erabiltzen duten gizonek baino 10,6 puntu gehiago); emakumeen % 56,8k bidaiekin eta ostatuarekin lotutako zerbitzuak erabiltzen dituzte (+7,5 puntu gehiago) eta emakumeen % 59,6k sare sozialetan parte hartzen dute (gizonek baino ehuneko 6,4 puntu gehiago). Bestalde, gizonen % 69,2k partekatzeko bideo-edukiak ikusten dituzte (emakume erabiltzaileek baino +6,2 puntu gehiago), gizonen % 32k jokoak jokatzen edo deskargatzen dituzte (+5,5 puntu gehiago) eta % 80,7k albisteak, egunkariak edo gaurkotasuneko aldizkariak irakurtzen dituzte (emakumeek baino +3,3 puntu gehiago).
Merkataritza elektronikoan ere aldeak daude sexuaren arabera: emakumeen % 73,7k arropa, oinetakoak eta osagarriak erosten ditu (gizonak baino ehuneko 15,4 puntu gehiago), emakumeen % 26,8k norberaren zaintzarako eta higienerako produktuak erosten ditu (ehuneko 9,4 puntu gehiago) eta % 30,9k kultura-ekitaldietarako sarrerak erosten ditu (+3,8 puntu). Gizonen artean, berriz, % 21ek ekipamendu elektronikoa erosten dute (emakumeek baino 11,9 puntu gehiago), % 12,6k ibilgailuak eta ordezko piezak (+9,6 puntu) eta kirol-materiala (arropa eta oinetakoak izan ezik) gizonen % 18,7k (+8,9 puntu).
Azken hiru hilabeteetan ordenagailua erabiltzeari dagokionez, biztanleriaren proportzioa % 70,1 da. Alde horretatik, gizonen % 72,8k erabiltzen du ordenagailua, eta emakumeen % 67,5ek. Beraz, generoen arteko aldea ehuneko 5,3 puntukoa da, 2023an baino ehuneko 0,4 puntu txikiagoa.
Familien ezaugarriek eragina dute etxeetako IKT ekipamenduetan
2024ko bigarren hiruhilekoan, 841.300 familiak dute Interneterako sarbidea beren etxebizitzetan (% 91,2), 2023an baino 21.600 familia gehiagok (+1 puntu). Biztanleriari dagokionez, 15 urte eta gehiagoko pertsonen % 94,7k (1.814.000) etxetik sar daiteke Sarean.
Bestalde, Euskal AEko etxeen % 77,1ek ordenagailua du, hau da, biztanleen % 83,9k ordenagailua du etxean (+1,3 puntu 2023tik). Etxekoen unitateen % 98,2an telefono mugikorra dago, eta 15 urte eta gehiagoko biztanleriaren % 99,1ek sakelako telefonoa du (+0,5 puntu 2023tik).
Etxeetako ikus-entzunezko ekipamenduari dagokionez, % 59k ordainpeko telebista du (+2,8 puntu), hau da, aurreko urtean baino 33.800 familia gehiago. Biztanleriari dagokionez, biztanleriaren % 64,7k du zerbitzu hori etxean (55.300 pertsona gehiagok).
Familia-moten arteko aldeak murriztu arren, horiek esanguratsuak izaten jarraitzen dute. Alderik handienak seme-alabak dituzten familien eta gainerakoen artean gertatzen dira, batez ere bakarrik dauden pertsonek osatutako familien artean. Hala, seme-alabak dituzten familien % 99,6k Interneterako sarbidea dute etxebizitzan, bakarrik dauden pertsonek osatutako familien aldean ia 18,2 puntu gehiago (% 81,4).
Bestalde, seme-alabak dituzten familien % 94,3k ordenagailu motaren bat du etxean, 36,7 puntuko aldea bakarrik bizi diren familiekiko (% 57,6). Azkenik, telefono mugikorrak presentzia zabalduagoa du eta alde txikiagoak ditu; seme-alabak dituzten ia familia guztiek daukate (% 100), ondoren bikoteen % 99,4k eta bakarrik dauden pertsonen % 95ek.
Euskal AEko biztanleriaren IKT ekipamenduak eta Interneten erabiltzaileak. 2024
| | 2024 urtea | 2023. urteari buruzko aldakuntza |
| | Mila | % | Mila | *P.P. |
| ETXEEN HORNIKUNTZAK | | | | |
| FAMILIAK | 922,1 | 100,0 | | |
| Ordenagailu pertsonala | 711,4 | 77,1 | 23,7 | 1,4 |
| Telefono mugikorra | 905,7 | 98,2 | 19,1 | 0,6 |
| Internet | 841,3 | 91,2 | 21,6 | 1,0 |
| Semeekin/alabekin | 406,5 | 99,6 | 2,7 | 0,1 |
| Bikote bakarrekoak | 186,1 | 89,3 | 7,8 | 1,5 |
| Bakarrik bizi diren pertsonak | 248,7 | 81,4 | 11,1 | 2,1 |
| 15 URTE ETA GEHIAGOKO BIZTANLEAK | 1.915,9 | 100,0 | | |
| Ordenagailu pertsonala | 1.608,1 | 83,9 | 45,6 | 1,3 |
| Internet | 1.814,0 | 94,7 | 36,5 | 0,8 |
| Ordainpeko telebista | 1.239,0 | 64,7 | 55,3 | 2,2 |
| DVD | 304,0 | 15,9 | 0,0 | 0,0 |
| Telefono mugikorra | 1.899,1 | 99,1 | 32,9 | 0,5 |
| INTERNET ERABILTZEN DUTEN BIZTANLEAK | 1.721,8 | 89,9 | 50,5 | 1,6 |
| Gizonak | 837,9 | 91,0 | 24,2 | 1,7 |
| Emakumeak | 883,9 | 88,8 | 26,3 | 1,5 |
| | | | | |
| Araba / Álava | 256,7 | 90,0 | 9,1 | 2,4 |
| Bizkaia | 902,8 | 89,9 | 23,6 | 1,2 |
| Gipuzkoa | 562,3 | 89,8 | 17,7 | 1,8 |
| | | | | |
| 15-24 urte | 220,3 | 99,9 | 10,0 | 0,0 |
| 25-34 urte | 209,4 | 99,9 | 1,8 | 0,4 |
| 35-44 urte | 272,9 | 99,6 | -7,6 | 0,4 |
| 45-54 urte | 353,2 | 99,3 | 7,5 | 0,6 |
| 55-64 urte | 325,3 | 97,9 | 14,9 | 1,8 |
| 65 urte eta gehiago | 340,7 | 65,0 | 23,8 | 3,8 |
| | | | | |
| Ikasten | 230,6 | 99,9 | 15,3 | 0,0 |
| Lanean | 924,5 | 99,2 | 8,2 | 0,1 |
| Langabezian edo jarduera-ezean | 566,7 | 75,3 | 27,0 | 3,6 |
| | | | | |
| Etxetik sartzen dira | 1.700,1 | 98,7 | 50,4 | 0,0 |
| Lantokitik sartzen dira | 677,9 | 39,4 | 4,8 | -0,9 |
| Ikastetxetik sartzen dira | 209,5 | 12,2 | 17,5 | 0,7 |
| | | | 108,4 | 3,6 |
| Euskaraz nabigatzen dute | 335,3 | 19,5 | 0,0 | -0,6 |
| Gastelaniaz nabigatzen dute | 1.676,4 | 97,4 | 56,2 | 0,5 |
| Ingeleseraz nabigatzen dute | 319,4 | 18,5 | 64,1 | 3,2 |
| | | | | |
| Internet bidez erosi duzu | 977,5 | 56,8 | 60,5 | 1,9 |
p.p = Aldea portzentajezko puntutan
Iturria: Eustat. Informazioaren gizartearen inkesta. Familiak
Informazio gehiago:
Eustat - Euskal Estatistika Erakundea / Instituto Vasco de Estadística
C/ Donostia-San Sebastián, 1 01010 Vitoria-Gasteiz
Prentsa-zerbitzua: servicioprensa@eustat.eus Tlf: 945 01 75 62