2024/12/18ko prentsa-oharra

ADMINISTRAZIO PUBLIKOEN DIREKTORIOA. 2024/01/01

Euskal Administrazio Publikoek 149.104 pertsona enplegatu zituzten 2024ko urtarrilaren 1ean, aurreko urtean baino % 1,5 gehiago

Funtzionarioak % 4,5 hazi dira, eta orain guztizkoaren % 64,6 dira

Euskal Administrazio Publikoek (Estatuko Administrazioaren eta Gizarte Segurantzaren mendeko langileak kontuan hartu gabe) 149.104 pertsona izan zituzten lanean 2024ko urtarrilaren 1ean, Eustaten datuen arabera. Euskal Administrazioetako landunen kopurua % 1,5 igo da aurreko urtearen aldean.

Euskal Administrazioan, 2024an, emakume enplegatuak (95.747) guztizkoaren % 64,2 dira: sexuaren arabera, 4 hamarren gehiago 2023ko datuen aldean. Bestalde, gizonen kopurua, 53.357, % 35,8 zen, eta aurreko urtearen aldean neurri berean jaitsi da. 2019tik 2024ra bitartean, emakumeen presentziak % 8,7ko hazkundea izan du Administrazioan.

Administrazio bakoitzeko feminizazio-tasa % 50etik gorakoa da: Eusko Jaurlaritza nabarmentzen da, % 70,2ko tasarekin, eta, ondoren, Foru-Aldundiak, % 60ra iritsiz. Hamar puntura daude Toki Erakundeak, eta horietan gizonen eta emakumeen pisua ia berdina da: gizonak % 50,1 dira, eta emakumeak % 49,9.

Egitura Euskal Administrazio Publikoetan, esparru arautzailearen arabera

2024ko urtarrilaren 1ean, funtzionarioak Euskal Administrazio Publikoetako langile guztien % 64,6 ziren, aurreko urtean baino ehuneko 1,9 puntu gehiago, urte arteko % 4,5eko igoeraren ondoren; lan-kontratuko langileak, berriz, % 34,5 ziren, bi kasuetan Osakidetzako estatutupeko langileak barne. Gainerako % 0,9 goi-kargudunei zegokien.

Enpleguaren behin-behinekotasunari dagokionez, langileen % 57,2 finko gisa sailkatzen da, eta funtzionario finkoak eta lan-kontratuko langile finkoak hartzen ditu, estatutupeko langile finkoekin batera.

Bitarteko funtzionarioak % 20,3 dira, aurreko urteko ehunekoaren antzekoa, % 1,6ko igoerarekin. Bitarteko funtzionarioen goranzko bilakaera hori ez da gertatzen EAEko administrazio guztietan; alde batetik, portaera positiboak dituzte Foru-Aldundiek eta Tokiko Erakundeek eta haien mendeko erakundeek, % 7,2ko eta % 5,8ko hazkundearekin, hurrenez hurren; bestetik, Eusko Jaurlaritzak, bere mendeko erakundeekin batera, eta Gainerako erakunde publikoek % 0,8ko eta % 1,7ko jaitsierak izan dituzte, hurrenez hurren.

Bestalde, aldi baterako lan-kontratuko langileen pisuak behera egiten jarraitzen du, % 21,6ra arte, aurreko urtearen aldean, % 8,3 jaitsi baita. Joera hori administrazio guztietan gertatzen da, eta nabarmentzekoak dira Foru Aldundiak eta haien mendeko erakundeak (%-12,7), ondoren Eusko Jaurlaritza eta mendeko erakundeak (%-9,7) eta Gainerako erakunde publikoak (%-4,9).

Oro har, bitarteko funtzionarioen eta aldi baterako lan-kontratuko langileen batura, 2024ko urtarrilaren 1ean, guztizkoaren % 41,9 da, % 3,7ko jaitsierarekin.

Langileen banaketa mendekotasun-administrazio motaren arabera

Euskal Administrazioko 149.104 langileetatik, 2024ko urtarrilaren 1ean, % 65,6 Euskal Autonomia Erkidegoko Administraziokoak ziren, % 18,6 Tokiko Erakundeetakoak, % 8,5 Foru-Aldundietakoak eta gainerako % 7,3 Unibertsitatekoak, Fundazioetakoak eta beste Erakunde Publiko batzuetakoak. Azken urtean, Foru Aldundietako enplegatuen kopuruak gora egin du gehien D % 3,2), gero Eusko Jaurlaritza eta Tokiko Erakundeak (% 1,7) eta horien mendeko erakundeak D % 1,6). Gainerako erakunde publikoetan % 3,1eko jaitsiera izan da aurreko urtearen aldean.

Urteko batez besteko langileen bilakaerari jarraituz, 2018. urtearekin alderatuta, EAEko administrazioetan lan egiten duten pertsonen kopurua 10.920 gehiago da, urteko batez besteko tasa metatua % 1,3 delarik. Balio absolutuetan, Eusko Jaurlaritzak, mendeko erakunde guztiekin batera, 8.086 langile gehiago izan zituen, % 1,5eko batez besteko aldakuntza metatuarekin. Tokiko erakundeak bigarren lekuan daude kopuru absolutuetan, 1.342 pertsona gehiagorekin, % 0,8ko batez besteko aldakuntza-tasa metatuarekin. Foru-aldundiak hirugarren postuan daude, 1.062 pertsona gehiagorekin eta % 1,5eko batez besteko tasa metatuarekin. Azkenik, Gainerako Erakunde Publikoen multzoa legoke, besteak beste, Euskal Herriko Unibertsitatea, Fundazioak eta Elkarte publikoak biltzen dituena, urteko % 0,7arekin eta 430 pertsona gehiagorekin.

Aurreko urtearen aldean, 2023an Euskal Administrazio Publikoetan lan egin zuten batez besteko langileek % 1,1eko hazkundea izan zuten, aztertutako aldiko batez besteko metatua baino tasa txikiagoa, eta nabarmentzekoa da Foru-Aldundietako eta haien mendeko organismoetako langileen % 4,2ko hazkundea.

Langileen banaketa mendekotasun-lurraldearen arabera

Lurralde historikoei dagokienez, apenas ikusten den aldaketarik lurraldeen banaketan; Bizkaiak langile enplegatu guztien % 49 hartzen du, ondoren Gipuzkoak (% 29,6) eta, azkenik, Arabak (% 21,4), aurreko urtearen aldean oso aldaketa gutxirekin.

Ohar metodologikoa: Administrazio Publikoen Direktorioa osatzen dute Euskal Autonomia Erkidegoko Administrazio Orokorrak, Foru-Aldundiek eta Udalek, bai eta haien mendeko Administrazioko Erakunde Autonomoek, Erakunde Publikoek, Sozietate Publikoek, Fundazioek eta Irabazi-asmorik gabeko erakundeek ere. Barne hartzen dira % 50eko edo hortik gorako partaidetza publikoa duten erakunde guztiak, dela administrazio bakar baten partaidetza, dela hainbat administrazio publikoren baterako partaidetza.

Informazio gehiago:

Eustat - Euskal Estatistika Erakundea / Instituto Vasco de Estadística C/ Donostia-San Sebastián, 1 01010 Vitoria-Gasteiz Prentsa-zerbitzua: servicioprensa@eustat.eus Tlf: 945 01 75 62