2024/11/15eko prentsa-oharra

IKERKETA ZIENTIFIKO ETA GARAPEN TEKNOLOGIKOKO JARDUEREI BURUZKO ESTATISTIKA-I+G. 2023

Euskal AEko I+Gko gastua % 11,6 hazi da, eta 2.000 milioi eurotik gorakoa izan da lehen aldiz 2023an

Euskal Administrazio Autonomoak finantzatzen du gauzatutako I+G guztiaren % 25,4

Euskal AEko barneko I+G gastua (Ikerketa eta Garapen Teknologikoa) lehen aldiz 2.000 milioi eurotik gorakoa izan zen 2023an, zehazki 2.002 milioi, Eustaten datuen arabera. Zifra hori % 11,6ko hazkundearen ondotik gertatu da, eta aurreko urtean baino 208 milioi euro gehiagoko gastua ekarri du.

BPGari dagokionez, Euskal AEko barneko I+G gastua % 2,16ra iritsi da 2023an, eta aurreko urtean, 2022an, lortutako 2,07a gainditu du. Datu horiek Europar Batasuna 27ko (EB-27) eta Espainiako azken datu erabilgarriekin alderatzeko, 2022ko datuak erabili behar dira: EB-27n BPGren % 2,27 zen, eta Espainian % 1,44.

Lurraldeen xehetasunetara jaitsiz, ikusten da 2023an erkidegoko barneko I+G gastu osoaren % 45,5 Bizkaian egin zela, % 42,6 Gipuzkoan eta % 11,9 Araban. Lurralde bakoitzeko BPGari dagokionez, gastu hori Gipuzkoakoaren % 2,76 da, Bizkaikoaren % 1,94 eta Arabakoaren % 1,60.

Barneko I+Gak 23.300 pertsona enplegatu zituen Dedikazio Osoko Baliokidetzan (DOB) 2023an, eta % 7,1 gehitu zen aurreko urtearen aldean. Era berean, ikertzaileak 16.305 izan ziren Dedikazio Osoko Baliokidetzan (DOB): hauek ere % 7,1eko hobekuntza izan zuten. Bi zifra horiek ere (DOBko pertsonen eta ikertzaileen guztizkoa), I+Gko gastua bezala, zifra errekorrak dira.

Euskal AEn egindako barneko I+G gastuaren % 77,2 enpresen sektoreak egin zuen

Barneko I+G gastuaren exekuzio-sektoreari dagokionez, gehienak, % 77,2 (1.545,7 milioi euro), Enpresek egin zituzten; % 16,4 (328,3 milioi), berriz, Goi-mailako irakaskuntzak, eta gainerako % 6,4a (128,5 milioi), berriz, Administrazioaren mendeko zenbait erakundek. Aurreko urtearen aldean, Enpresek % 11,6 gehitu zuten I+Gko gastua, % 10,9 Erakundeek eta % 11,5 Goi-mailako irakaskuntzak.

Barneko I+G gastuaren finantzaketaren ikuspegitik, Enpresek 1.111 milioi euro bideratu zituzten ikerketara, 2022an baino % 10,7 gehiago. Zifra hori finantzaketa osoaren % 55,5 da, baina finantzatutako guztizkoan duen partaidetza ehuneko 0,4 puntu jaitsi da aurreko urtearen aldean. Hala ere, finantzaketa-iturri nagusia izaten jarraitzen du. Finantzaketa publikoak, bestalde, 681 milioi eman zituen, aurreko urtean baino % 11,9 gehiago, eta barneko I+G gastu osoaren % 34,0 da.

Funtsen gainerako jatorria Goi-mailako irakaskuntzan dago (35,5 milioi), Irabazi-asmorik gabeko erakunde pribatuetan (15,2 milioi) eta Atzerrian (159,9 milioi). Hiru zenbateko horiek gastu osoaren gainerako % 10,5 dira.

Finantzaketa publikoaren jatorriari dagokionez, Euskal Autonomia Erkidegoko Administrazioaren ekarpena da nagusi (508,9 milioi). Ekarpen hori, aurreko urtearen aldean % 6,8 igo ondoren, administrazio publikoak 2023an finantzatutako guztizkoaren % 74,7 eta gure erkidegoan gauzatutako I+G guztiaren % 25,4 da.

Bestalde, Administrazio Zentralak (135,6 milioi) % 29,5 handitu du bere finantzaketa aurten, eta Administrazio Publikoek finantzatutako guztizkoaren % 19,9an kokatu du bere partaidetza. Azkenik, Aldundiek eta Toki-administrazioek (36,5 milioi) % 5,4rekin parte hartu dute, eta ekarpena ere % 34,7 handitu da aurreko urtearen aldean.

Dedikazio osoko I+Gko enplegatuak 23.300 izan ziren, % 7,1 hazi ondoren. Exekuzio-sektoreka: 16.452 pertsona Enpresetan (% 6,7ko hobekuntza eta guztizkoaren % 70,6); 5.345 Goi-mailako Irakaskuntzan (+% 7,4 eta guztizkoaren % 22,9); 1.502 Administrazio Publikoan (+ % 11,7 eta guztizkoaren % 6,4). Lanbide-kategoriari dagokionez, ikertzaileak 16.305 dira (+% 7,1); teknikariak 5.287 (+% 9,8); eta, azkenik, laguntzaileak 1.708 (+% 0,6).

I+Gko langileen % 37,3 emakumeak izan ziren 2023an

2023an, dedikazio osoko I+Gko langile guztien % 37,3 emakumeak ziren. 2022an I+Gn aritu ziren emakumeen kopurua baino % 8,2 gehiago dira, eta 2023an 8.688 dira guztira. Langile guztien artean duten pisua lau hamarren igo da aurreko % 36,9tik, eta, denbora-ikuspegi zabalago batetik, haien pisua 3,9 ehuneko-puntu igo da 2010. urtearekiko, eta 10,7 punturaino 2000. urtearekiko.

I+Gren exekuzio-sektorea kontuan hartuta, ikus daiteke Enpresen sektorean eta Goi-mailako Irakaskuntzan dagoela emakumeen presentzia nabarmenena kuantitatiboki: 5.116 eta 2.688 emakume, hurrenez hurren, eta 884 emakume Administrazio Publikoaren sektorean. Hala ere, termino erlatiboetan, Administrazio Publikoan emakumeak langile guztien % 58,8 dira, Goi Mailako Irakaskuntzan % 50,3 eta Enpresetan % 31,1.

OHARRA

Eustatek eskerrak eman nahi dizkie estatistika hau egiten lagundu duten enpresa eta erakunde guztiei. Informazio-bilketa 2024ko apiriletik urrira bitartean egin da, egindako ahaleginagatik. Horien laguntzarik gabe ez zen posible izango.

Informazio gehiago:

Eustat - Euskal Estatistika Erakundea / Instituto Vasco de Estadística C/ Donostia-San Sebastián, 1 01010 Vitoria-Gasteiz Prentsa-zerbitzua: servicioprensa@eustat.es Tlf: 945 01 75 62