2024/09/26ko prentsa-oharra

MIGRAZIO-MUGIMENDUEN ESTATISTIKA. 2023

Euskal AEko migrazio-saldoak positiboa izaten jarraitzen du 2023an: 20.928 pertsona

Atzerriko herrialdeekiko migrazio-saldoa % 18 murriztu da; autonomia-erkidegoekiko saldoa, berriz, positiboa izan da berriro, 1.814 pertsonatan

Eustaten datuen arabera, 2023an migrazio-saldoak positiboa izaten jarraitu zuen (20.928 pertsonakoa), baina % 5,6 murriztu zen 2022ren aldean (22.171 pertsona). 2023an 58.568 immigrazio izan ziren, eta 2022an, berriz, 59.194 (% 1,1eko jaitsiera). Emigrazio-kopuruak, berriz, gora egin du pixka bat: 2022an 37.023 pertsonak emigratu zuten, eta 2023an 37.640k (% 1,7ko igoera)

Migrazio-saldoak goranzko joera izan du urtean zehar: urtarriletik ekainera 9.591 pertsonatan izan zen positiboa, eta urtearen bigarren erdian handiagoa izan zen, 11.337 pertsona.

Lurralde historikoen arabera, Bizkaiak du migrazio-saldorik altuena, 11.622 pertsonarekin, eta 2022rekiko ere jaitsiera txikiena izan du (-%1,4); Gipuzkoak 6.097 pertsonako saldo positiboa izan du, eta jaitsierarik handiena (2022an baino % 14,3 gutxiago), eta Arabako saldoa 3.209koa izan da (% 2 gutxiago).

Hiriburuei dagokienez, saldo positiboak dituzte hirurek: 3.839 Bilbok, 1.241 Donostiak eta 2.405 Gasteizek.

Euskal Autonomia Erkidegoaren eta gainerako autonomia-erkidegoen arteko mugimenduei dagokienez, 2023an 1.814 pertsonako saldo positiboa zenbatu zen, 2019tik gertatzen ez zena. Bestalde, atzerriko herrialdeekiko saldoa 19.114 pertsonakoa izan da, hori ere positiboa, baina 2022an baino % 18 txikiagoa.

Kanpoko edo erkidegotik kanpoko mugikortasun geografikoa –jatorria edo helmuga Euskal Autonomia Erkidegotik kanpo duten bizileku-aldaketak– ia egonkor mantendu da: 1.000 biztanleko 44 izan ziren 2022an, eta 2023an 43,8. Lurraldeka, Araban ia 2 puntu igo da Erkidegotik kanpoko mugikortasun-geografikoa, ‰ 48,5era iritsiz; Gipuzkoan, aldiz, ‰ 1,5 puntu murriztu da, ‰ 41,1era iritsiz; eta Bizkaian ‰ 44,1ean mantendu da.

Autonomia-erkidegoekiko migrazio-saldoa positiboa izan zen 2023an (1.814 pertsona), eta negatiboa 2022an (1.153)

Autonomia-erkidegoekiko migrazio-mugimenduak kontuan hartuz gero, Euskal Autonomia Erkidegoak migrazio-saldo positiboa izan zuen: 11k migrazio-saldo positiboa izan zuten, eta beste 6en saldoa negatiboa izan zen. Horrela, 2023an saldoa 1.814 pertsona gehiagokoa izan zen, aurreko urteko 1.153ko saldo negatiboaren aldean.

Euskal Autonomia Erkidegoa utzi eta beste autonomia-erkidegoetara emigratu duten pertsona gehienak, % 56,5 hain zuzen, hurrengo bost autonomia-erkidegoetara joan dira nagusiki: Gaztela eta Leon, Madril, Kantabria, Katalunia eta Andaluzia, hurrenkera horretan. Beste autonomia-erkidego batzuetara egindako migrazioak 19.677 izan dira guztira.

Autonomia-erkidego berak izan ziren etorkin gehien ekarri zituztenak, beheranzko ordena honetan: Madril, Gaztela eta Leon, Andaluzia, Katalunia eta Kantabria. Bosten artean, Estatuko gainerako herrialdeetatik etorritako etorkin guztien % 58,5 ekarri zuten. Beste autonomia-erkidego batzuetatik etorritako migrazioak, guztira, 21.491 izan dira.

Andaluzia da saldo positibo handiena duen autonomia-erkidegoa (647 pertsona), eta Errioxa, negatiboena (217 pertsona).

Etorkinen % 70ek eta emigratzaileen % 50ek atzerriko nazionalitatea zuten

Etorkinen batez besteko adina urte erdi baino gehiago igo da, 33,1era arte, eta emigratzaileena 37,1 urte da. 20-39 urteko pertsonek immigrazioen % 50,9 eta emigrazioen % 47,4 egin zituzten. Adin-talde ohikoenak 25-29 urtekoak (immigrazioen % 15,2 eta emigrazioen % 14) eta 30-34 urtekoak (immigrazioen % 13,2 eta emigrazioen % 13,3) dira.

Sexuaren araberako aldeak pixka bat handitu dira aurreko urtearekin alderatuta: gizonak etorkinen % 52,5 dira eta emakumeak % 47,5; antzera, emigratzaileen % 53,8 gizonak dira eta % 46,2 emakumeak.

Atzerriko nazionalitatea zuten pertsonen immigrazioak 40.957 izan ziren 2023an, hau da, immigrazio guztien % 69,9. Horietatik 33.316 zuzenean atzerriko herrialde batetik etorri ziren (% 81,3), eta gainerakoak, 7.641, beste autonomia-erkidego batetik (% 18,7), batez ere Madrildik, Kataluniatik eta Andaluziatik.

Atzerriko nazionalitatea duten pertsonen emigrazioak 18.695 izan ziren, hau da, emigrazio guztien % 49,7. % 72k atzerriko herrialderen bat izan zuten helmuga. Ondorioz, atzerritarren migrazio-saldoa positiboa izan zen: 22.262 izan ziren 2023an, eta 25.354, berriz, 2022an, hau da, aurreko urtean baino % 12,2 gutxiago.

Euskal biztanleriaren bizileku-aldaketen % 60 Euskal AEn gertatzen da

Euskal AEko biztanleen % 10,9k bizileku-aldaketaren bat egin zuen 2023an, eta mugikortasun hori, kasuen % 60an, Euskal Autonomia Erkidegora barnekoa izan zen; gainerako kasuetan, berriz, erkidegotik kanpokoa.

Guztira, 240.211 ohiko bizileku-aldaketa zenbatu dira Euskal AEn. Horietatik 91.045 udalerri berean aldatu ziren. Erkidego barruko mugikortasuna, hau da, Euskal AEko udalerrien jatorria eta helmuga duena, 52.958 mugimendutara igo zen.

Era berean, kanpoko edo erkidegotik kanpoko 58.568 immigrazio erregistratu ziren, hau da, jatorria erkidegotik kanpo dutenak eta helmuga Euskal Autonomia Erkidegoa dutenak; horietatik 37.077 atzerritik etorri ziren, 2022an baino % 5,6 gutxiago.

Azkenik, kanpoko edo erkidegotik kanpoko 37.640 emigrazio izan ziren, edo, bestela esanda, Euskal AEko udalerri batetik kanpora etorritako egoitza-aldakuntzak; horien % 47,7 (17.963) atzerrira joan ziren.

Informazio gehiago:

Eustat - Euskal Estatistika Erakundea / Instituto Vasco de Estadística C/ Donostia-San Sebastián, 1 01010 Vitoria-Gasteiz Prentsa-zerbitzua: servicioprensa@eustat.eus Telf.: 945 01 75 62