2025/07/31ko prentsa-oharra

UNIBERTSITATEARI BURUZKO ESTATISTIKA. 2024

Euskal AEko unibertsitateetan matrikulazio-bolumena % 2,5 hazi zen 2023/24 ikasturtean

Gradu bikoitzak % 18 hazi ziren unibertsitate publikoetan

2023/24 ikasturtean, Euskal AEko unibertsitateetan 72.915 matrikula erregistratu ziren, aurreko ikasturtean baino % 2,5 gehiago, Eustaten datuen arabera. Matrikulen hazkundea unibertsitate-maila guztietan gertatu zen.

Hazkundea modu desberdinean eman zen sistema publikoaren eta pribatuaren artean. Unibertsitate publikoek 2022/23 ikasturtean baino 606 ikasle gehiago hartu bazituzten ere, titularitate pribatukoetan 1.167 izen-emate gehiago izan ziren. Termino erlatiboetan, zifra horiek % 1,2ko eta % 5eko igoerak izan zituzten, hurrenez hurren. Hala ere, unibertsitate publikoek jarraitu zuten ikasle gehienak trebatzen (% 68,1), batez ere doktoretza-ikasketetan (% 85,7).

Gradu bikoitzek azken urteetako goranzko joerari eutsi zioten, eta 3.700 matrikula baino gehiago izan zituzten, aurreko ikasturtean baino % 11,9 gehiago. Berriro ere, igoera ez zen homogeneoa izan unibertsitate publikoen eta pribatuen artean. Hala ere, arlo horretan, bilakaera handiagoa izan zen sistema publikoan, % 17,7 izen-ematen gehiago erregistratu baitziren gradu bikoitzetan; unibertsitate pribatuetan, aldiz, % 6,6ko igoera izan zen.

Eskaera handiena izan zuen baterako titulazioa Enpresen Administrazioa eta Zuzendaritza (EAZ) eta Zuzenbidea konbinatzen dituena izan zen, 796 ikaslerekin. Ondoren, Lehen Hezkuntzako eta Jarduera Fisikoaren eta Kirolaren Zientzietako gradu bikoitza azaltzen da; bertan 416 pertsonak eman zuten izena.

EAZ, Lehen Hezkuntza eta Zuzenbidea eskaera gehien duten ikasketen podiumean

Hiru titulaziotan bildu zen graduko ikasleen % 22. Enpresen Administrazio eta Zuzendaritzako, Lehen Hezkuntzako eta Zuzenbideko graduak dira, eta matrikula gehien zituzten titulazioen rankingeko lehen postuetan kokatu ziren, bai gizonen artean, bai emakumeen artean. Hala ere, matrikulatutako ikasle gehien zituzten hamar graduen taldea osatu zuten gainerako titulazioak oso desberdinak izan ziren gizonezkoen eta emakumezkoen artean. Gizonezkoen sailkapenean hainbat ingeniaritza agertzen ziren bitartean, emakumezkoen kasuan osasun- eta gizarte-arloko karrera ugari agertzen ziren.

Datuak gradu bakoitzaren barruan zegoen sexuen banaketaren ikuspegitik begiratuta, azken urteetako emaitzak errepikatu ziren. Pedagogia eta Haur Hezkuntza izan ziren feminizatuenak, izan ere, bertako ikasleen % 88,4 eta % 85,3, hurrenez hurren, emakumeak ziren.

Beste muturrean, berriz, Automobilgintza Ingeniaritza, Itsas Ingeniaritza eta Mekatronika Ingeniaritza daude; horietan hamar ikasletik bat baino ez zen emakumea. Bideojokoen Diseinu eta Garapeneko graduaren kasua nabarmendu zen; 2023/24 ikasturtean eman zen lehen aldiz, eta gizonez soilik osatutako talde txiki batekin hasi zen.

Nesken eta mutilen artean oreka handiena lortu zuten titulazioen artean, erakundeen kudeaketaren arloko batzuk zeuden, hala nola Enpresen Administrazioa eta Zuzendaritza, Negozioen Kudeaketa, Zientzia Politikoa eta Kudeaketa Publikoa edo Negozioei Aplikatutako Datuen Analitika.

Euskara gehiago unibertsitate publikoetan eta ingelesa gehiago pribatuetan

Euskal unibertsitateetako ikasleek prestakuntza jasotzen duten hizkuntzari dagokionez, matrikulatutako kredituen erdia baino gehiago gaztelaniaz eman zen (% 54,6), eta euskararen eta ingelesaren erabilera % 37,7koa eta % 7,3koa izan zen, hurrenez hurren. Beste hizkuntza batzuen presentzia, frantsesa edo alemana kasu, hutsaren hurrengoa izan zen. Hala ere, bai ikastegiaren titulartasun publiko edo pribatuak, bai ikasketa-mailak, graduak edo masterrak eragina izan zuten irakaskuntzaren hizkuntza-banaketan.

Alde horretatik, euskara gehiago erabiltzen zen unibertsitate publikoetan pribatuetan baino. Zehazki, esparru publikoan euskaraz emandako kredituen proportzioa pribatuan emandakoa baino ehuneko 16 puntu handiagoa izan zen. Aldiz, unibertsitate pribatuetan publikoetan baino gehiago izan ziren ingelesez emandakoak.

Ikasketa-mailaren araberako banaketari dagokionez, garrantzitsua da adieraztea, graduko ikasketekin alderatuta, non banaketa lehen aipatutakoaren antzekoa izan baitzen, gaztelania nagusitu zela masterretan, euskararen kaltetan. Hala, master-ikasketetan matrikulatutako hamar kreditutik zazpi gaztelaniaz eman ziren. Gainerakoak, erdibana banatu ziren euskara eta ingelesaren artean.

Gainditu zuten doktore-tesien kopurua % 8,1 handitu zen

2023/24 ikasturtean 14.608 ikaslek amaitu zituzten ikasketak EAEko unibertsitateetan, aurreko ikasturtean baino % 2,4 gehiagok. Hazkundea maila akademiko guztietan eman zen, baina, bereziki, doktoretzan, 669 doktoretza-tesik gainditu baitzuten, 2022/23an baino 50 gehiagok, hau da, % 8,1eko hazkundea izan zen.

Ikasketa-adarraren araberako tituludunen banaketa aldatu egin zen mailen artean. Gradu bat gainditu zutenen erdiak baino gehiagok Gizarte eta Lege Zientzien adarra osatzen duten titulazioetako batean egin bazuten ere, lau doktore berritik batek bakarrik irakurri zuen esparru horretako doktoretza-tesi bat. Kontrako kasua eman zen Zientzien adarrean. Graduko ikasketak amaitu zituzten pertsonen % 5ek bakarrik lortu zuten titulu zientifiko bat, hala nola Biologia, Kimika edo Matematika, besteak beste. Hala ere, proportzio hori % 23,2ra igo zen doktoretza-tituluetan.

Parekotasuna unibertsitateko irakasleen artean

10.400 pertsona inguruk osatu zuten euskal unibertsitateetako plantilla. Hamarretik sei irakasle-lanetan aritu ziren, eta bat ikerketa-lanetan soilik. Gainerakoek lan teknikoak, kudeaketakoak eta administrazio eta zerbitzuetakoak egin zituzten.

Sexuen araberako banaketa paritarioa izan zen, bai irakasleen artean, bai ikertzaileen artean. Hala ere, kudeaketa- eta administrazio-taldeetan emakumeak gizonak baino bi aldiz gehiago ziren.

Informazio gehiago nahi izanez gero:

Euskal Estatistika Erakundea / Instituto Vasco de Estadística
Donostia-San Sebastián kalea, 1 01010 Vitoria-Gasteiz
Prentsa-zerbitzua: servicioprensa@eustat.eus Tel.: 945 01 75 62