Panorama demografikoa sintesi-eragiketa bat da, bi urtez behin egiten da, eta Euskal Autonomia Erkidegoko biztanle-kopuruaren bilakaera eta adin-egitura aztertzen ditu, hiru gauza hartuz kontuan: oraingo eta lehengo hilkortasuna, jaiotza-tasa eta migrazio-mugimenduak; alegia, momentu bakoitzean biztanleria zerk berritzen eta ugaritzen duen eta zerk urritzen duen kontuan hartuz. Ezin ahaztu, gainera, biztanleriak zer egitura duen adinez eta sexuz, horrek ere eragiten baitu jaiotza- eta heriotza-tasan; eta immigrazio-emigrazio arteko aldea gehitzen badugu (positiboa zein negatiboa izan baitaiteke), erlazio anitzeko sistema bat izango dugu, non faktoreek emaitza baldintzatzen duten, baina, era berean, emaitzak ere baldintzatzen dituen faktoreak.