2025/06/25eko prentsa-oharra

SEKTORE PUBLIKOAREN AURREKONTUEN ESTATISTIKAK. 2023

Euskal AEko Administrazio Publikoen zor bizia, aurreko urtearen aldean, 302,8 milioi euro jaitsi zen 2023ko abenduaren 31n

Sozietateen gaineko Zergaren sarrerek % 21,3 egin zuten gora 2023an eta 1.649 milioi eurora iritsi ziren

Eustaten datuen arabera, Euskal AEko Administrazio Publikoen zorra 12.847,1 milioi eurokoa izan zen 2023ko abenduaren 31n, aurreko urtean baino 302,8 milioi gutxiago, hau da, % 2,3ko jaitsiera izan zuen. Horren barruan sartzen dira Eusko Jaurlaritza, Foru-aldundiak eta Udal Administrazioak, dagozkien Erakunde Autonomoekin eta udalerria baino lurralde-eremu txikiagoko eta handiagoko Erakundeekin batera. BPGari dagokionez, % 13,9 izan zen (2022ko abenduaren 31n % 15,2 izan zen); hau da, ehuneko 1,3 puntu egin du behera. 2023an hartutako pasibo berriak 1.005,5 milioi izan ziren eta amortizazioak, berriz, 1.308,3 milioi.

2023aren amaieran amortizatu gabe zegoen zor biziaren guztizkotik, Eusko Jaurlaritzarena Euskal AEko administrazio guztien % 79,9 zen eta, ondoren, Bizkaiarena % 12,9, Arabarena % 4,5 eta, azkenik, Gipuzkoarena % 2,6.

Aurrekontu-saldo ez-finantzarioaren azterketak adierazten digu, erakundeka, lurralde bakoitzeko administrazioen artean (Foru-aldundiak eta Toki-erakundeak), hiru lurraldeek finantzazkoa ez den superabita dutela. Bizkaia nabarmentzen da 147 milioiko saldoarekin, ondoren, Araba 104 milioiko saldoarekin eta, azkenik, Gipuzkoa 55 milioiko saldo positiboarekin. Bestalde, Eusko Jaurlaritzak 147 milioiko defizit ez-finantzarioa izan zuen.

Euskal AEko Administrazio Publikoek erregistratutako gastuen eta diru-sarreren xehetasunera jaitsiz gero, gastu osoari dagokion zatia 23.268 milioi eurokoa izan zen, hau da, aurreko urtean baino % 7,6 gehiago. Bestalde, diru-sarrerak 22.953 milioira iritsi ziren, hau da, aurreko urtean baino % 5,9 gehiago.

Eragiketa ez-finantzarioei dagokienez, diru-sarrerek eta gastuek bilakaera positiboa izan zuten 2022aren aldean: gastuak % 8,5 igo ziren eta diru-sarrerak % 4,4. Emaitza hori Aurrekontu-saldo Ez-finantzarioan islatzen da: saldo hori positiboa izan zen 2023an, 158 milioi eurokoa, eta 2022an, berriz, 952 milioi eurokoa.

Diru-sarrera ez-finantzarioen hazkundea diru-sarrera arrunten bilakaera positiboan oinarritu zen (% 5,6), sarrera guztien % 95,5 izan baitziren. Kapital-eragiketen ondoriozko diru-sarrerek, pisu txikiagoarekin, % 30,1eko jaitsiera nabarmena izan zuten.

Finantza-eragiketen azterketari dagokionez, bilakaera desberdinak ikusten dira diru-sarreren eta gastuen artean: diru-sarrera finantzarioak 1.031 milioi eurora iritsi ziren, aurreko urtean baino % 55,6 gehiago; baina gastu finantzarioak 1.504 milioi eurora heldu ziren, 2022aren aldean % 4,0 jaitsita.

Euskal administrazioen zerga bidezko diru-sarrerek, oro har, portaera positiboa izan zuten, 19.031 milioi eurora iritsita. Partida hori diru-sarrera guztien % 82,9 da, eta baterako hazkunde-tasa % 4,9koa izan da.

Zerga guztiek portaera positiboa izan zuten BEZak izan ezik. Zerga bakoitza aztertzen hasita, ikusten da zerga bidezko diru-sarrera guztietan garrantzi handiena duena PFEZ dela % 37,3ko partaidetza-kuotarekin eta, 2022aren aldean, % 8,6ko igoerarekin. Horren atzetik datoz Sozietateen gaineko Zerga (% 8,7ko pisuarekin eta % 21,3ko igoerarekin), Zerga Bereziak (guztizkoaren % 8,1 eta % 7,2ko igoerarekin), Bestelako Zergak (% 5,2ko partaidetza eta % 5,4ko igoerarekin) eta Udal Zergak (% 4,9ko igoerarekin eta % 4,3ko pisuarekin).

Adierazi den bezala, BEZa izan zen portaera negatiboa izan zuen zerga bakarra, % 2,3ko jaitsierarekin. Horren pisua kontuan hartuta (guztizkoaren % 36,4), 2023an zerga guztien igoerak 2022an baino portaera neurritsuagoa izan du (2022an +% 8,5 izan zen).

Aldiak 20222023

Bestelako sarrera arruntak – tasak, transferentziak eta ondarezko sarrerak, besteak beste – eragiketa arrunten ondoriozko sarrera guztien % 11,1 izan ziren, eta % 12,3ko igoera izan zuten.

Gastuen partidei dagokienez, gastu arruntak % 7,5 igo ziren. Hazkunde hori, batez ere, Transferentzia arrunten partidak eragin zuen, gastu guztien % 29,6ko pisuarekin, % 10,1eko hazkundea izan baitzuen 2022aren aldean. Bestelako gastu arruntak % 6,4 hazi ziren (% 31,6ko pisuarekin) eta Langileria-gastuak % 20,2 pisuarekin, % 5,6 igo ziren.

Inbertsioetan eta kapital-transferentzietan egindako gastuak guztizkoaren % 12,2 izan ziren, hau da, aurreko urtearen aldean % 16,1 gehitu ziren.

Informazio gehiago:

Eustat - Euskal Estatistika Erakundea / Instituto Vasco de Estadística
Donostia kalea 1, 01010 Vitoria-Gasteiz
Prentsa-zerbitzua: servicioprensa@eustat.es Tel: 945 01 75 62