Euskal AEko industriako prezioak %1,4 igo ziren 2005eko urtarrilean, EUSTATek landutako datuen arabera. Datu horiek kontuan hartuta, urtarrileko urte arteko tasa (azken hamabi hilabeteetan industri prezioek izandako aldakuntza laburbiltzen duena) %7,7 hazi zen.

Sektorekako azterketa xeheagoak agerian uzten du, 2005eko urtarrilean, metalezko eta ez-metalezko meak (%5,7), petrolioa fintzea (%4,8), larruaren eta oinetakoen industria (%2,5), ehungintza eta jantzigintza (%1,9), bestelako manufakturak (%1,8) eta metalgintza eta metalezko gaiak (%1,6) adarrek, besteak beste, gehitu zituztela gehien prezioak, aurreko hilaren aldean. Prezioetan jaitsiera izan zuen sektore bakarra papera, argitalpena eta arte grafikoak (%-0,2) izan zen urtarrilean.

Urte arteko aldian (2005eko urtarrila, 2004ko urtarrilaren aldean), prezio-hazkunderik handienak honako sektore hauei egokitu zitzaizkien: metalgintza eta metalezko gaiak (%16,9), metalezko eta ez-metalezko meak (%16,7), petrolioa fintzea (%15,5), makineria (%6,0) eta bestelako manufakturak (%3,5) sektoreei. Kontrako noranzkoan, jaitsierak izan zituzten larruaren eta oinetakoen industria (%-4,3), zurgintza (%-0,2) eta material elektrikoa (%-0,2) sektoreetako prezioek.

Ondasunen helburu ekonomikoaren araberako sailkapen berriari jarraituz, urtarrilean, sektore-talde handien prezioen bilakaerak gorantz egin zuen talde guztietan: energia (%3,7), bitarteko ondasunak (%1,3), kontsumo-ondasun iraunkorrak (%1,1) eta kontsumo-ondasun ez-iraunkorrak (%0,8) batzen dituzten kontsumo-ondasunak (%0,9) eta ekipo-ondasunetan (%0,6).

Hiru ondasun-talde horietako prezioen bilakaerek ere alde nabarmenak izan zituzten urte arteko aldian. Guztiek izan zituzten urte arteko gehikuntzak: bitarteko ondasunen prezioak %11,2 igo ziren, energiarenak %10,6, ekipo-ondasunenak %3,7 eta kontsumo-ondasunenak %2,4. Horien barruan, kontsumo-ondasun iraunkorren prezioak %2,3 igo ziren eta kontsumo-ondasun ez-iraunkorrenak %2,5.